تحليل وسام | ما بعد مباراة الاتحاد 2 × 1 العروبة .. الجولة الـ 4 .. دوري عبداللطيف جميل 2014 / 2015
تحليل ما بعد مباراة : دوري عبداللطيف جميل 2014 / 2015 .. الجولة الـ 4
الاتحاد 2 × 1 العروبة ,, على ملعب الاتحاد ( استاد الملك عبدالله بجده )
الأهداف من : (1) ديديه ياكونان ,, (2) عبدالرحمن الغامدي
#محللي_اتي_تايقرز
تويتر المحلل : @wesambadghish
تحليل : وسام بادغيش
——————————————————-
بـسـم الله الـرحـمـن الـرحـيـم
اولاً راح أتكلم و بشكل مطول عن خط الدفاع اللي كانوا كلهم سيئين ولكن افضل السيئين كان القاسم ، اختيار الأسماء كانت كلها خطأ و اتوضح لنا ان باسم و طلال باقي عليهم وقت كبير حتى يكونوا أساسيين . الحقيقة ان عمرو أنور تفلسف بعدم ادراج الدميري من ضمن قائمة الـ 18 لاعب ، و اضف الى ذلك إشراك عسيري كلاعب إرتكاز ووضع جمال ك صانع لعب متأخر .
هنا أوضح لكم الخطه المثاليه اللي من المفترض يشارك فيها المدرب بدلا من الإهتزاز اللي شاهدناه
كل لاعب طلع من هذي التشكيلة كان سيء لدرجة لا توصف ، و الحقيقة ان التغييرات لمن تغير المباراة تعرف ان المدرب :
إما لم يقرأ الخصم بالشكل الممتاز
أو لا يملك نظرة ممتازة
هذي كلها خصال سيئة في أي مدرب ، و المشكلة الأكبر ان المدرب لم يثبت على خطة محددة و هذا يصعب الانسجام و ايضاً الجمل التكتيكية المحدودة . في مباراة الامس .
اما التسديد أو لعب كرات عرضية
ما كنا نشوف الجمل التكتيكية اللي نقدر نقول ان الاتحاد قادر يسجل على اقوى الفرق الدفاعية ، خوف من المدرب من اللعب بطريقة هجومية امام الأندية الغير منافسة !! كلها تساؤلات تجعل الواحد يفكر لو انا ما اهاجم ضد الأندية الضعيفة متى اهاجم ؟؟ و شي غريب ثاني ليش الاتحاد دائماً ما يقدر يدافع ؟؟ هل المشكلة انه ما يملك مدافعين ممتازين ؟؟ او ان الاتحاد ما يملك مدرب يحط الأسماء الممتازة و انا اميل للجزء الثاني من السؤال .
شرح للهدف الأول على الاتحاد :
نلاحظ في هذي اللقطة اولاً كانت ركنية للاتحاد و من بعد هذي الركنية ما نلاقي اقصر لاعبين الاتحاد في الخلف ( باسم ، طلال ) يعني كفاية انهم سيئين في التغطية وتخليص الكرات .. قصار قامة غير كذا تخليهم يطلعوا عشان الركنيات هذي كارثة !!
اما الكارثة الثانية هي في القاسم و راشد اثنين على واحد الأول كان مع اللاعب و كان يضايقه و تركه في لحظة ، و خلى اللي امامه يتحمل الخطأ هذا و برضو بدل ما يشيل غلطة القاسم في التوقف عن الضغط حاول مجارته لكن راشد مش ولا بد بصراحة و اخيراً عماها فواز بالتمركز الخاطئ .
في الهدف في 5 اخطاء تخيلوا من هدف واحد ؟؟ تقدم من قلوب قصار القامة ، التوقف عن الضغظ بدون سبب ، عدم القدرة على الافتكاك ، تمركز خاطئ .
و المشكلة الأكبر ان بداية المباراة العروبة اللي كان ضاغط عشان يسجل على الاتحاد !! كنا نشوف اول 7 دقائق هجمات للعروبة و ما كنا نشوف شي من الاتحاد ، ( و هذي الكوم باك ) اللي كنت ابغاها من الاتحاد ان يسجل في اقرب وقت . على الأقل يدي اريحية للاعبينه .
في الخط الامامي كان في فراغ بين خط الوسط الدفاعي و الهجومي . بسبب وضع ارتكازين دفاعيين ووضع جمال كصانع لعب متأخر مما سبب فراغ و اجبار خط الوسط الهجومي للعودة الى الخلف .
بعد ما شفنا التبديلات بدخول ياكونان و الغامدي و القميزي لقينا في وصول ايش السبب ؟؟
(1) دخول يكونان سبب كثافة هجومية
(2) القميزي كان رابط بين الوسط الدفاعي للوسط الهجومي بتقدماته
(3) جمال اخذ دور المحور الحر في الشوط الثاني و سار يتقدم الى حدود المناطق .
(4) الغامدي قدم كثافة و سحب للعبين و تقليل الكثافة في اطراف الملعب .
لمن عمل هذي التغييرات قدم حلول اكثر شفنا التسديد والكرات العرضية اكثر من التوغل ، مع اني كنت ضد خروج ماركينهو و كان المفترض خروج نور او عبدالفتاح اللي محد منهم قدم أي شي في المباراة.
اخيراً يجب إيجاد مدرب على مستوى عالي يعرف كيف يوظف اللاعبين ، يعرف كيف يقدم تشكيلة اساسية تربط بين الخطوط الدفاعية و الهجومية ، ما يكون جبان و يلعب بطريقة هجومية ضد الأندية الدفاعية .
في ختام التحليل .. لا يسعنا الا ان نسأل الله ان يكون ما عرضناه نال على استحسانكم ..
لمشاهدة تحليل ما قبل المباراة ( اضغط هنا )
